Ferðir um Kaupmannahöfn

Nánar um gönguna

Nánar um hjólatúrinn

Meira um kráartúrinn

Hafið samband

Meira um Köben

SENDA TÖLVUPÓST

Gangan hefst á Ráðhústorginu sem er eins konar miðpunktur borgarinnar. Fyrir ekki svo löngu voru hér borgarmúrar og hlið sem var lokað á nóttunni; Vesturhliðið eða Vesterport. Allt fyrir utan torgið var sveit. Gengið verður um Pissurennuna, eitt elsta hverfi Kaupmannahafnar, sem geymir margar sögur um fjölskrúðugt mannlíf og einnig Jónas Hallgrímsson. Þar er enn líf og fjör í þröngum strætunum sem hýsa yfir 60 bari og veitingastaði. Þaðan er haldið yfir í Latínuhverfið þar sem íslensk saga er við hvert fótmál, enda bæði Gamli Garður og Háskólinn á svæðinu. Gengið í gegnum miðaldarbæinn sem hefur iðað af lífi í 850 ár og líklegast lengur.

Auk þess að vera uppspretta sagna um Íslendinga í alls konar ástandi, beljur á fjórðu hæð og ódýra snagagistingu hefur miðbær Kaupmannahafnar þróast og breyst á undanförnum tuttugu árum og er í dag sannkölluð lítil heimsborg sem ávallt er gaman er að skoða. Göngunni lýkur á Kóngsins nýjatorgi, hugsanlega með drykk á Vínstofu Hvíts, til heiðurs Íslendingum sem dreypt hafa á glasi þar undanfarin þrjú hundruð ár.

Í boði er einnig að halda göngunni áfram, svona í um hálftíma í viðbót yfir í Nýju Kaupmannahöfn þar sem meðal annars má skoða hinar stórmerkilegu Nýbúðir sem Kristján fjórði lét byggja fyrir flotann. Göngunni lýkur þá með heimsókn í Jónshús þar sem Jón Sigurðsson bjó frá 1854 til dauðadags 1879. Hvor endinn sem er valinn þá er þetta frábær ganga, full af skemmtilegum sögum af nútíð og fortíð þessarar gömlu höfuðborgar Íslands.

Ferðin tekur 1,5 klukkustund ef henni lýkur við Kóngsins nýja torg, en tvær klukkustundir ef endað er við Jónshús.

HEIM
HAFA SAMBAND

Gangan hefst við Sendiráð Íslands. Heyrum um pakkhúsið sem auk sendiráðsins hýsir Menningarhús Íslands, Færeyja og Grænlands (Norðurbryggju). Verslunarsagan er rifjuð upp og svæðið skoðað, heyrum af hinum víðfræga veitingastað Noma sem hóf göngu sína í húsinu og starfrækir fleiri veitingastaði á svæðinu. Bryggjusvæðið sem áður var kennt við lýsistunnur og tugthús er í dag hin mesta lúxusstaðsetning og hér má finna íbúðir sem eru með þeim dýrustu á Kaupmannahafnarsvæðinu.

Höldum frá bryggjunni að nýrri göngu- og hjólabrú, Innri hafnarbrúnni, sem tengir Kristjánshöfn við Nýhöfn. Frá brúnni virðum við fyrir okkur höfnina og heyrum af þeim fjölmörgu breytingum sem átt hafa sér stað á liðnum árum; Borgarleikhúsið, Ofelia ströndin, virðum fyrir okkur Óperuhúsið og Pappírseyjuna sem mun taka miklum breytingum á næstu árum, sem og matarmarkaðinn sem fyrir enda brúarinnar.

Héðan liggur leiðin að Kristjaníu, fríríkisins margrómaða. Förum inn um bakdyrnar, röltum eftir aðalgötu svæðisins og heyrum af lífinu á þessum afar sérstaka og umdeilda stað. Áfram heldur förin fram hjá kvennafangelsinu agalega og að Kirkju frelsara vors sem einkennist af afar fallegum snúnum turni. Að lokum liggur leið okkar meðfram fallegum síkjum Kristjánshafnar að nýrri brú eftir Ólaf Elíason, sem nefnist Hringbrúin, Cirkelbroen. Hér lýkur ferðinni, en einnig er möguleiki á að heimsækja eina af elstu krám Kristjánshafnar, aðeins steinkast frá brúnni, en í Rabes Have, sem hýsir samnefnda krá, var stunduð brennivínsframleiðsla frá 1678.

Ferðin tekur um 1,5 klst, að undantalinni kráarheimsókn í lokin.

HEIM
HAFA SAMBAND

Norðurbrú er fjölmenningarlegt samfélag. Suðupottur þar sem andstæðurnar mætast og lifa saman. 80 þúsund búa í hverfum sem eru mörg og misjöfn. Sums staðar er öfgatrú alsráðandi og á nokkrum stöðum stýra glæpagengi málum á nóttunni. Skotbardagar blossa upp með reglulegu millibili. Annars staðar er allt vaðandi í verslunum og veitingastöðum sem eru hip & cool og vinsælir. Víða eftirsótt íbúasvæði. Margar göturnar huggulegar, mikið um græn svæði og víða frumleg hönnun á útisvæðum.

Byrjum við Vötnin á brú Lovísu drottningar. Hvergi fleiri hjól. Kíkjum á Blágarðs torg sem kallað var Svarti ferningurinn áður fyrr sökum sóts. Norðurbrú var verkamannahverfi, Rabbarbarahverfið, en gekk í endurnýjun lífdaga og er nú vinsælt meðal listamanna og námsmanna. Meðalaldur íbúa er hvergi lægri. Blágarðsgata er lífleg sem og Ravnsborggata og Sankt Hans Torg. Iðandi mannlíf, skemmtileg kaffihús og fjörug stemning.

Assistens kirkjugarðurinn, þar sem HC Andersen hvlir lúin bein, er sérstakur því hann er eitt vinsælasta útivistarsvæði Norðurbrúarbúa. Kíkt á Jægersborggötu og Stefánsgötu sem eru tvær af mest „trendy“ götum borgarinnar, Michelin veitingastaðir, sérverslanir og hönnarbúðir. Óhugsandi á Norðurbrú fyrir aðeins örfáum árum. Endum (jafnvel á kaffisopa) á Rauða torginu, við Mjölnisgarð, sem er eitt alræmdasta „gettóið“. Sumir þora ekki að vera á ferli hér, en yfirleitt gerist ekki neitt, alla vega ekki að degi til. Auðvelt þó að fá á tilfinninguna að þetta sé önnur borg í öðru landi. Fjölbreytnin í öllu sínu veldi. Héðan gengur strætó niður í bæ, tekur tíu mínútur.

Gönguferðin tekur um 1,5 klukkustundir.

HEIM
HAFA SAMBAND

Við hefjum leikinn við endann á Nýhöfn við nýju hjólabrúnna sem vísar út að Kristjánshöfn. Hjólum yfir brúna og höldum áleiðis inn í best geymda leyndarmál Kristjaníu, hjólastígana á gömlu borgarmúrunum sem í margar aldir umkringdu borgina. Heyrum af sögu svæðisins og lífinu þar í dag. Héðan er hjólað í gegnum Kristjánshöfn yfir á Íslands Bryggju og yfir nýja hjólabrú, Hjólaslönguna, sem tengir okkur við Vesturbrú. Skoðum hinn margrómaða hipsterahluta borgarinnar, Kjötbæinn, þar sem finna má bari, gallerí, veitingastaði og að sjálfsögðu slátrara að gömlum sið!

Áfram er haldið yfir á Friðriksberg, þar finnum við skemmtilegan hjólastíg sem ber okkur yfir á enn einn hipstera stað borgarinnar, verslunargötuna Jægersborggötu á Norðurbrú. Hér gefst smá tími til að skoða sig um áður en haldið er áfram eftir hjólastígnum að Rauða torginu á Norðurbrú þar sem ríkir allt annar tónn en annar staðar í borginni. Hér má sjá Halal-kaupmenn og slæðuklæddar konur á hverju horni, en torgin tvö (Rauða Torgið og Svarta Torgið) eru skemmtileg "margmenningartorg" sem vert er að skoða. Héðan er svo snúið tilbaka að aðalgötu hverfisins, Norðurbrúargötu, þaðan sem leið liggur að Markaðssölunum, Torvehallerne, matarmekka Kaupmannahafnar. Þar endar ferðin - enda tilvalinn staður til að njóta drykkjar og snarls eftir hreyfingu dagsins.

Ferðin tekur 2,5 klst.

Hámarksfjöldi: 10 manns.

HEIM
HAFA SAMBAND

Vínstofa Hvíts við Kónsins nýjatorg er líklega elsta kráin í Kaupmannahöfn, hefur starfað í ýmsum myndum samfleytt frá 1723. Auk Hvíts eru mörg gömul klassísk vertshús í borginni, svo sem Bo-Bi, Borgarkráin og Café Nick. Lítið hefur breyst í hundrað ár, víða eru reykingar leyfðar og stemningin hugguleg og afslöppuð. Fjör færist yfir þegar líður á kvöldið, gestir á öllum aldri. Krárnar hafa lengi verið eins konar sameiginleg setustofa almennings í borginni, félagsheimili þar sem menn og konur hittast og spila eða ræða málin yfir drykk.

Á áttunda og níunda áratugnum komu hin svokölluðu „café“ til Kaupmannahafnar, að franskri fyrirmynd, frægust líklegast Café Sommersko, Café Dan Turell og Café Victor. Boðberi nýrra tíma, sum hafa staðist tímans tönn og eru enn vinsæl, meðan önnur hverfa á braut, eins og gengur. Café-in eru öðru vísi en gömlu vertshúsin, þykja fínnni, eru dýrari, og leggja meira uppúr mat, að minnsta kosti í seinni tíð, en margar gömlu krárnar hófu starfsemi sína sem mötuneyti; verkamenn máttu borða nestið sitt gegn því að kaupa öl eða brennivín.

Að minnsta kosti þrjár aðrar tegundir veitingastaða sem fókusera á drykki frekar en mat hafa skotið upp rótum á undanförnum áratug eða svo. Í fyrsta lagi eru það bjórbarirnir þar sem áherslan er lögð á nýjar tegundir öls. Höfða ekki síst til ungra karlmanna, oft skeggjaðra hipstera.

Síðan má nefna kokteil barina. Þeir poppa upp eins og gorkúlur um þessar mundir, aðaláherslan er lögð á als konar blandaða drykki, eins og nafnið gefur að kynna. Að síðustu eru það vínbarirnir sem hafa verið vinsælir undanfarin ár. Mest lagt uppúr góðum vínum og oft boðið upp á einfaldan matseðil.

Krárnar í Kaupmannahöfn, hverju nafni þær nú nefnast, eru mikilvægur og áberandi partur af borgarlífinu. Í þessari ferð heimsækjum við fjórar krár. Hver um sig afar ólík hinum, samt allar frábærar, Reynum að átta okkur á sögunni og þessari markilegu stofnun borgarinnar.

Túrinn tekur um 2,0 til 2,5 klst.

Hámarksfjöldi er 10

HEIM
HAFA SAMBAND